स्मार्ट सिटी सोलापूर शहरातील ‘स्मार्ट वर्क’
सोलापूर : ईगल आय मीडिया
येथील कोंतम चौक ते कन्ना चौक मार्गावर गुरुवारी ड्रेनेज लाईन टाकण्याचे काम सुरू असताना ठिकठिकाणी मोठे चेंबरसुद्धा बांधण्यात येत आहेत. मात्र स्मार्ट सिटीने पाईपलाईनला चेंबरमध्ये घेऊन काम उरकले आहे. भविष्यात याच जलवाहिनीमधून गळती होऊन ड्रेनेजचे पाणी पिण्याच्या पाईपलाईनमध्ये जाणार नाही का ? असा संतप्त सवाल जनतेमधून विचारण्यात येत आहे.
कोंतम चौक ते कण्णा चौक या ठिकाणी पाण्याची मोठी पाईपलाईन आडवी येत असताना व तिची अन्य जागेवरून व्यवस्था न करता थेट पाईपलाईन चेंबर च्या आत घेतली. येथे काम पाहणारे अभियंता यांनी तर काम पूर्ण झाल्यानंतर पिण्याची पाईपलाईन बाजूला घेणार असल्याचे अजून उत्तर दिले.
सोलापुरात स्मार्ट सिटीची बोगस कामे होत असताना लोकप्रतिनिधी मात्र गप्प आहेत आणि मनपा सत्ताधारी भाजप मात्र काहीही बोलण्यास तयार नसल्याचं पाहायला मिळत आहे. केंद्रातील मोदी सरकारने मोठा गाजावाजा करत देशभरातील अनेक शहरांमध्ये बदल घडवण्यासाठी स्मार्ट सिटी प्रकल्पाची घोषणा केली.
या प्रकल्पावर विरोधकांकडून वारंवार टीका करण्यात येते. अशातच सोलापुरातून एक धक्कादायक प्रकार समोर आला असून स्मार्ट सिटीच्या कामाविषयी मोठं प्रश्नचिन्ह निर्माण झालं आहे.
सोलापूर शहरातील स्मार्ट सिटीच्या कामाचा पुरता बोजवारा उडाला आहे. शासनाच्या कोट्यवधी रुपयांचा चक्क चुराडा होताना सोलापूरकर डोळ्याने पाहत आहेत. स्मार्ट सिटीची अनेक कामे बोगस झाल्याचा आरोप होत आहे. तसंच सध्या होत असलेल्या कामावरुन नागरिकांच्या जीविताशी जणू खेळच सुरू असल्याचे स्पष्टपणे दिसून येत आहे.
