मोहोळ तालुक्यातील अजब चोरी
मोहोळ : ईगल आय मीडिया
अज्ञात चोरट्याने शेतकऱ्याची दोन लाख रुपये किंमतीची दुभती जनावरे चोरून नेल्याची घटना शुक्रवारी मध्यरात्री मोहोळ तालुक्यातील वडाचीवाडी गावच्या शिवारात घडली. राजेंद्र पांडुरंग म्हमाणे (रा. वडाचीवाडी) असे चोरी झालेल्या शेतकऱ्याचे नाव आहे. या घटनेची नोंद मोहोळ पोलिसात करण्यात आली आहे.
या बाबत पोलिस सूत्रांकडून मिळालेली अधिक माहिती अशी की, वडाचीवाडी येथील राजेंद्र म्हमाणे हा शेतकरी शेतीला जोडधंदा म्हणून दुग्ध व्यवसाय करतो. त्यांच्याकडे दूध देणाऱ्या दोन जर्सी गाई, एक म्हैस, दोन जर्सी कालवड, तर एक शेळी असे पशुधन आहे. त्यांची शेती सोलापूर पुणे महामार्ग लगत असून ते दररोज रात्री जनावरांना चारा पाणी करून गावातील घरी झोपण्यासाठी जातात.
१२ मार्च रोजी राजेंद्र म्हमाणे हे रात्री नऊ वाजता नेहमीप्रमाणे चारापाणी करून गावातील घरी झोपण्यासाठी गेले होते. दुसऱ्या दिवशी १३ मार्च रोजी सकाळी सहा वाजता ते शेतात आले असता त्यांना आपली जनावरे दिसली नाहीत. त्यामुळे त्यांनी मोडनिंब, शेटफळ सह आजूबाजूच्या गावात सर्वत्र शोध घेतला. मात्र जनावरे कुठेच मिळून आली नाहीत. त्यामुळे त्यांची तब्बल दोन लाख पाच हजार रुपये किंमतीचे पशुधन चोरी झाल्याची खात्री पटली.
या प्रकरणी राजेंद्र म्हमाणे यांनी मोहोळ पोलिसात दिलेल्या तक्रारीवरून अज्ञात चोरट्याचा विरोधात गुन्हा दाखल करण्यात आला आहे. या गुन्ह्याचा पुढील तपास पोलीस नाईक शरद ढावरे हे करीत आहेत. दरम्यान पशुधन चोरीच्या या घटनेमुळे वडाचीवाडी शेटफळ परिसरातील शेतकऱ्यांमध्ये भीतीचे वातावरण निर्माण झाले आहे.
