बेडरुममधील क्लिप्स दाखवून 3 लाखांची खंडणी मागितली.
टीम : ईगल आय मीडिया
घरात असलेला सीसीटीव्ही दुरुस्त करण्याच्या निमित्ताने आलेल्या ऑपरेटरने बेडरूममधील अ‍ॅक्सेस आपल्या मोबाईलवर घेतला. त्यानंतर त्या दाम्पत्याच्या बेडरुममधील खासगी क्षण आपल्या मोबाईलमध्ये रेकॉर्ड करुन खंडणीसाठी दाम्पत्याला ब्लॅकमेल करीत होता. दरम्यान, सदर दाम्पत्याने तक्रार केल्यानंतर पोलिसांनी त्या विकृत ऑपरेटर ला अटक केली आहे.
दक्षिण दिल्लीत राहणाऱ्या तक्रारदार दाम्पत्याच्या घरातील सीसीटीव्ही काही महिन्यांपूर्वी बिघडला होता. त्यामुळे त्यांनी संबंधित कंपनीकडे कॅमेरा दुरुस्त करण्यासंबंधी तक्रार केली. यावेळी कंपनीने तंत्रज्ञाला घरी पाठवण्याची हमी दिली. संबंधित कंपनीत टेक्निशियन म्हणून काम करणारा आरोपी राशिद सीसीटीव्ही रिपेअर करण्याच्या निमित्ताने दाम्पत्याच्या घरी गेला होता.
यावेळी त्याने दाम्पत्याच्या नकळत सीसीटीव्हीचा अ‍ॅक्सेस आपल्या मोबाईलवर घेतला. काही महिन्यांनी दाम्पत्याच्या मोबाईलवर त्यांच्याच बेडरुममध्ये शूट झालेली त्यांची खासगी व्हिडीओ क्लीप आली. तीन लाख रुपयांची खंडणी न दिल्यास हा अश्लील व्हिडीओ सोशल मीडियावर अपलोड करण्याची धमकी आरोपीने त्यांना दिली.
पीडित पती-पत्नी नोकरी करतात. त्यांची मुलगी घरी एकटी असते. तिची काळजी घेण्यासाठी एका महिलेला कामावर ठेवले आहे. यासाठी दाम्पत्याने घरात जागोजागी सीसीटीव्ही बसवले होते. परंतु आरोपीने त्याचा गैरफायदा घेतला.
दाम्पत्याने पोलिसात तक्रार दाखल केली. दिल्ली पोलिसांच्या सायबर सेलने बंगळुरुतून राशिदला अटक केली. राशिद मूळ उत्तर प्रदेशचा रहिवासी आहे. दिल्लीत काम करताना त्याने हे प्रकार केले होते. लॉकडाऊनच्या काळात आधीची नोकरी सोडून तो बंगळुरुला गेला. राशिदचा मोबाईल पोलिसांनी जप्त केला असून त्यात अनेक व्हिडीओ पोलिसांच्या हाती लागले आहेत. त्याने हे प्रकार कुठे आणि कधीपासून केले आहेत, याचा शोध पोलीस घेत आहेत.
