इगतपुरी येथील रिसॉर्टवर हाई प्रोफाईल पार्टी
टीम : ईगल आय मीडिया
नाशिक जिल्ह्यात इगतपुरी येथे एका रिसॉर्टमध्ये सुरु असणाऱ्या रेव्ह पार्टीवर नाशिक ग्रामीण पोलिसांनी धाड टाकली आहे. यावेळी बिग बॉस फेम अभिनेत्री सह पोलिसांनी २२ जणांना अटक केली आहे. याशिवाय यात चित्रपटसृष्टीतील चार महिलांचाही समावेश आहे.
मुंबई- आग्रा महामार्गावरील दोन बंगल्यात रेव्ह पार्टी सुरु होती. नाशिक ग्रामीण पोलीस अधीक्षक सचिन पाटील यांना या प्रकाराची माहिती मिळाल्यानंतर पोलिसांच्या टीमनं या रिसोर्टवर धाड टाकली. यावेळी महिला व पुरुष पार्टीत होते.
रेव्ह पार्टी करणं तरुणांना चांगलंच महागात पडलं आहे. मध्यरात्री दोन वाजता पोलिसांनी ही कारवाई केली आहे. या पार्टीत मनोरंजन क्षेत्रात काम करणाऱ्या चार महिलाही होत्या. तसंच, ‘बिग बॉस’ या कार्यक्रमात सहभागी झालेल्या महिलेचाही सामावेश आहे. त्याशिवाय १० पुरुष आणि १२ महिलांसह एकूण २२ जणांना पोलिसांनी ताब्यात घेतलं आहे.
इगतपुरीतील एका रिसॉर्टमध्ये अवैध काम सुरु असल्याची टीप पोलिसांना मिळाली. या माहितीनुसार पोलिसांनी रिसॉर्टमधील बंगल्यावर कारवाई केली. यावेळी पार्टीत सहभागी झालेले लोक ड्रग्ज आणि हुक्काचं सेवन करत होते, अशी माहिती पोलीस अधीक्षक सचिन पाटील यांनी दिली आहे.
