चोरीच्या 3 मोटारसायकली जप्त केल्या
मोहोळ : ईगल आय मीडिया
मोटारसायकलींची चोरी करुन विक्री करणाऱ्या टोळीचा मोहोळ पोलिसांनी पर्दाफाश केला आहे. खुणेश्वर (ता. मोहोळ ) येथील मोटरसायकल चोरांना ताब्यात घेऊन पोलिसांनी त्यांच्याकडून चोरीच्या तीन मोटारसायकली जप्त केल्या. बळीराम मगन चव्हाण, किरण रामचंद्र चव्हाण, विजय बाळासाहेब चव्हाण (सर्व रा. खुणेश्वर ता. मोहोळ) अशी पकडण्यात आलेल्या मोटारसायकल चोरांची नावे आहेत.
या बाबत पोलिस सूत्रांकडून मिळालेली अधिक माहिती अशी की, गेल्या काही दिवसांपासून मोहोळ पोलिस स्टेशनच्या हद्दित मोटारसायकल चोरीच्या घटना घडत आहेत. त्या संदर्भात मोहोळ पोलिसात अज्ञात चोरट्यांच्या विरोधात चोरीचे गुन्हे देखील दाखल आहेत. त्यामुळे मोहोळ गुन्हे प्रकटीकरण शाखेचे (डी.बी) पथक सोमवार १७ ऑगस्ट रोजी पोलिस स्टेशन हद्दित पेट्रोलिंग करीत होते. यावेळी मोहोळ तालुक्यातील खुणेश्वर गावात चोरुन आणलेल्या मोटारसायकली असल्याची गोपनीय माहिती पोलिस प्रशासनाला मिळाली. त्यानुसार पोलिस निरीक्षक सुर्यकांत कोकणे यांच्या सुचनेनुसार पोलिस नाईक शरद ढावरे, पो.कॉ. गणेश दळवी, पो.कॉ. प्रविण साठे यांचे पथक कारवाईसाठी गेले. हे पथक खुणेश्वर गावात गेले असता, गावातील बळीराम मगर चव्हाण, किरण रामचंद्र चव्हाण, विजय बाळासाहेब चव्हाण यांच्याकडे चोरीच्या तीन मोटारसायकल मिळाल्या. या मोटारसायकलींसह तिघांनाही चौकशीसाठी ताब्यात घेऊन मोहोळ पोलिस स्टेशन येथे आणले.
यावेळी १५ जुलै २०२० रोजी चोरी झालेल्या गुन्ह्यातील दोन मोटारसायकल आणि वरील तिघांकडे मिळालेल्या मोटारसायकल एकच असल्याचे समजले. त्यांपैकी एक मोटारसायकल अंजली आनंद अबुटे (रा. मोहोळ) तर दुसरी दिपक परमेश्वर धोटे (रा. कातेवाडी ता. मोहोळ) यांच्या असल्याचे निष्पन्न झाले. तर तिसरी मोटारसायकल या चोरट्यांनी तुळजापूरातून चोरल्याचे समजले.मोटारसायकल चोरीच्या अनेक गुन्ह्यांची उकल होण्याची शक्यता आहे.
