या कम्पनीने लावली सर्वात कमी बोली
टीम : ईगल आय मीडिया
राजधानी नवी दिल्लीत नवीन संसद भवन बांधण्याचे काम टाटा कंपनीला मिळण्याची शक्यता आहे. कंपनीने प्रारंभिक बोली जिंकली असून टाटा प्रोजेक्ट्स लिमिटेडने बुधवारी ८६१.९० कोटी रुपये खर्चाने नवीन संसद भवन बांधण्यासाठी बोली लावलीय. तर एल अँड टी लिमिटेडने ८६५ कोटींची बोली सादर केली होती, अशी माहिती अधिकाऱ्यांनी दिलीय.
आम्ही एल 1 बिड जिंकली आहे. टाटाने यासाठी सुमारे ८६२ कोटी रुपये अपेक्षित खर्च सादर केला आहे. तर एल अँड टीने ८६५ कोटी खर्च सांगितला आहे. पण ही अंतिम बोली नाही, असं टाटा कंपनीने म्हटलं आहे.
टाटाची बोली कमी आहे. त्यामुळे टाटा कंपनीला नवीन संसद भवन बांधण्याचं काम मिळेल हे जवळजवळ निश्चित मानलं जातंय.
दिल्लीतील सध्याची संसद भवन इमारत खूप जुनी झाली आहे. 1921 या इमारतीचे काम सुरू होऊन 1927 साली ते पूर्ण झाले होते. इंग्रजांनी बांधलेली ही इमारत लवकरच 100 वर्षे पूर्ण करणार आहे. सुरक्षेच्या दृष्टीने यावर अनेक प्रश्न उपस्थित केले जात आहेत. सुरक्षेसंदर्भातील धोका लक्षात घेता केंद्र सरकारने संसदेची नवीन इमारत बांधण्याचा निर्णय घेतला आहे.
विद्यमान इमारतीजवळ नवीन संसद भवन बांधण्यात येईल. या भवनचे बांधकाम केंद्रीय व्हिस्टा पुनर्विकास प्रकल्पांतर्गत तयार केले जाईल. नवीन संसद भवनाचे बांधकाम येत्या २१ महिन्यांत पूर्ण होईल, असा अंदाज व्यक्त केला जातोय. नवीन संसदेची इमारत भूखंड क्रमांक ११८ वर बांधली जाईल, असं केंद्रीय सार्वजनिक बांधकाम विभागानं (CPWD) म्हटलंय.
संसद भवनची नवीन इमारत बांधण्यासाठी तीन बांधकाम कंपन्या आर्थिक बिड सादर करण्यास पात्र मानल्या गेल्या आहेत, यामध्ये लार्सन अँड टुब्रो (एल अँड टी), टाटा प्रोजेक्ट्स, शापूरजी पालनजी अँड कंपनीचा समावेश आहे,असं यापूर्वी सीपीडब्ल्यूडीने म्हटलं होतं.
