कोरोना संकटात राजकारण करीत नाही : फडणवीस यांचा दावा
टीम : ईगल आय मीडिया
महाराष्ट्रात आमचा पक्ष सर्वात मोठा आहे. तिन्ही पक्षांपेक्षा आमचा पक्ष मोठा आहे, पण आज आम्ही विरोधी बाकांवर बसलेलो आहोत. तरीही कोरोना चे आम्ही राजकारण करीत नाही असे प्रतिपादन राज्य विधानसभेतील विरोधी पक्षनेते देवेंद्र फडणवीस यांनी केले. बिहारमध्ये बुद्ध गया येथे ते पत्रकारांशी बोलत होते.
विरोधी पक्षनेते देवेंद्र फडणवीस यांच्यावर बिहार विधानसभेची जबाबदारी सोपवण्यात आलेली आहे. बिहारमध्ये सध्या ते विविध भागांचा दौरा करून आढावा घेत आहेत. शनिवारी बौद्धगया येथे झालेल्या बैठकीनंतर फडणवीस यांची पत्रकार परिषद झाली. फडणवीस यांना राज्यात गाजत असलेल्या मुद्यांसदर्भात काही प्रश्न विचारण्यात आले.
यावेळी बोलताना फडणवीस म्हणाले, “आज महाराष्ट्रात कोरोनाचं मोठं संकट आहे. आजघडीला १० लाखांपेक्षा जास्त करोनाचे रुग्ण आहेत. देशात करोनामुळे झालेल्या एकूण मृत्यूपैकी चाळीस टक्के मृत्यू महाराष्ट्रातील आहेत. त्याचबरोबर महाराष्ट्रात दिवसाला २३ ते २५ हजार रुग्ण आढळून येत आहेत. त्यामुळे मला वाटतंय की आमच्या मुख्यमंत्र्यांनी करोनाच्या संकटावर अधिक लक्ष दिलं पाहिजे. राजकारण, कंगनाचा विषय किंवा त्यांच्या पक्षाच्या नेत्याकडून नेव्ही अधिकाऱ्यावर झालेला हल्ला या सगळ्या गोष्टींकडे त्यांचं लक्ष असलं पाहिजे. महत्त्वाचं म्हणजे सगळ्यात आधी त्यांनी करोनाशी लढाई लढावी. ना विरोधी पक्षासोबत वा कंगनासोबत,” असा टोला फडणवीस यांनी लगावला.
“विरोधीपक्ष पूर्णपणे सहकार्य करत आहे. अगदी पहिल्या दिवसापासून भाजपा सरकारसोबत आहे. विरोधात असलो, तरी आम्ही स्पष्टपणे सांगितलेलं आहे की, करोनाच्या संकटात आम्ही कसलंही राजकारण करणार नाही,” असंही फडणवीस यांनी सांगितलं.
