प्रस्थापितांना धडा शिकवून जनता परिवर्तन करेल : अभिजित पाटील
पंढरपूर : प्रतिनिधी
माढा विधानसभा मतदारसंघाचे महाविकास आघाडीचे उमेदवार अभिजीत पाटील यांच्या प्रचारार्थ मेंढापूर ते पांढरेवाडी दरम्यान अभिजीत पाटील यांची भव्य बाईक रॅली काढून ग्रामस्थांकडून जोरदार स्वागत करण्यात आले. रविवारी पंढरपूर तालुक्यातील मेंढापूर, पांढरेवाडी, जाधववाडी, वरवडे, वाफेगाव, वाघोली, लवंग, महाळूंग या गावांना भेट दिली.
यावेळी बोलताना अभिजीत पाटील म्हणाले की, माझ्या माध्यमातून सर्वसामान्यांचा विकास झाला पाहिजे, त्यांना मदतीचा हात मिळाला पाहिजे हा एकच विचार घेऊन मी आपल्या समोर आलो आहे. मी सत्ता मिळावी म्हणून आपल्यासमोर उभा नाही तर परिवर्तनासाठी आपल्यासमोर आलो आहे. प्रदीर्घकाळ सत्तेत राहूनही प्रस्थापितांना माढा मतदार संघातील नागरिकांना साध्या मूलभूत सुविधा पुरविता आल्या नाही हे दुर्दैव आहे. म्हणूनच राष्ट्रवादीने या शेतकऱ्याच्या पोराला उमेदवारी दिली आहे.
यंदाची निवडणूक आता जनतेनं हाती घेतली असून अन्यायी प्रस्थापितांना धडा शिकवत यंदा परिवर्तन घडवून आणायचं हाच जनतेचा निर्धार आहे असा विश्वास त्यांनी व्यक्त केला. यावेळी अनेक वक्त्यांनी आपले मनोगत व्यक्त करताना माढ्याचा रखडलेला विकास करण्यासाठी अभिजीत पाटील यांना निवडून देण्याचे आवाहन केले.
