पूलाच बराचसा भाग वाहून गेल्याने वाहतुक ठप्प
पंढरपूर : ईगल आय मीडिया
पंढरपूर तालुक्यात शुक्रवारी झालेल्या पावसाने भंडीशेगाव येथील पुलाचे मोठे नुकसान झाले आहे. पुलाचा एक बाजूचा अर्धा भाग खचला आहे आणि जागोजागी खड्डे पडले आहेत. वरचा बहुतांश भाग वाहून गेल्याने मागील 12 तासांपासून पुलावरील वाहतूक ठप्प आहे.
गुरुवार आणि शुक्रवारी तालुक्यातील भाळवणी, भंडीशेगाव सर्कल मध्ये अतिवृष्टी झाली त्यामुळे कासाळ ओढ्याला पूर आला. या ओढ्याला एवढ्या मोठ्या प्रमाणात पहिल्यांदाच पूर आल्याचे सांगितले जाते. 2011-12 साली नव्याने बांधण्यात आलेल्या भंडीशेगाव येथील पुलावरून पाणी वाहिले. शुक्रवारी सायंकाळी 7 वाजल्यापासून या पुलावरील वाहतूक पुर्णपणे बंद करण्यात आली आहे. त्यामुळे पंढरपूर – अकलूज, माळशिरस या भागातील वाहतूक पूर्णपणे ठप्प आहे.
प्रांताधिकारी सचिन ढोले यांनी ओढ्यावरील पाण्याची पाहणी करून वाहतूक बंद केली. शनिवारी सकाळी पुराचे पाणी ओसरले असले तरी पुलाचे मोठे नुकसान झाले आहे. शनिवारी सकाळी तहसीलदार वैशाली वाघमारे यांनी पुलाची पाहणी केली.
पुलाचे मोठे नुकसान झाले असून आज दिवसभर वाहतूक बंद राहण्याची शक्यता आहे. पुलाची दुरुस्ती तातडीने करण्याची गरज आहे. अन्यथा धोकादायक अवस्थेतील पुलामुळे एखादी दुर्घटना होण्याची शक्यता व्यक्त आहे.
