मनसे प्रदेश सरचिटणीस दिलीप धोत्रे यांची मागणी
पंढरपूर : ईगल आय मीडिया
आषाढी यात्रेसाठी येणाऱ्या लाखो भाविकांच्या सुविधेसाठी शासन पाच कोटी रुपयांचे अनुदान देते, हे अनुदान याही वर्षी मिळाले.मात्र यात्रा रद्द झाल्यामुळे नगरपालिकेकडे ही रक्कम शिल्लक आहे. नगरपालिकेने तो निधी वापरात आणत शहरवासीयांच्या सर्व करमाफीसहित नगरपालिकेचे गाळा भाडे माफ करावे, अशी मागणी महाराष्ट्र नवनिर्माण सेनेचे दिलीप धोत्रे यांनी केली आहे.
धोत्रे यांनी दिलेल्या निवेदनात म्हटले आहे की, यंदाच्या लॉकडाऊनमुळे पंढरपूरकर नागरिक आर्थिक अडचणीमध्ये आहेत. व्यापाऱ्यांचाही व्यवसाय झालेला नाही, त्यामुळे सर्वांनाच आर्थिक चणचण भासत आहे. अशामध्ये सरकारने काही सोयी-सुविधा देऊ केल्या आहेत, परंतु पंढरपूरचे स्थानिक कर आणि भाडे नगरपरिषदेने माफ केल्यास त्यांना थोडाफार आर्थिक आधार मिळू शकतो.
मुख्यमंत्र्यांनी पाच कोटी रुपयांचा यात्रा अनुदान निधी दिला आहे. त्यातील कोणतीही यात्रेची कामे यंदा होऊ शकली नाहीत, या रकमेचा विनियोग करत ते सर्व धारकांचे भाडे तसेच सर्व कर भरून घ्यावेत आणि नागरिकांना, व्यापाऱ्यांना कर आणि गाळे भाड्यातून सूट द्यावी, अन्यथा मनसे स्टाईलने आंदोलन करण्यात येईल, असा इशारा महाराष्ट्र नवनिर्माण सेनेच्यावतीने देण्यात आला आहे.
यावेळी तालुका अध्यक्ष शशिकांत पाटील, शहर अध्यक्ष सिद्धेश्वर गरड, उपाध्यक्ष महेश पवार, नागेश इंगोले, समाधान डूबल इत्यादी उपस्थित होते.
