4 वेळा केली कोविड तपासणी
टीम : ईगल आय मीडिया
विधानपरिषदेचे आमदार प्रशांत परिचारक यांचे कोरोनाचे दोन वेगवेगळे अहवाल असल्याचा मुद्दा मंगळवारी सभागृहात गाजला. तसेच पंढरपूर तालुक्यात ही यासंदर्भात उलट सुलट चर्चा सुरू झाली होती. या संदर्भात आ. प्रशांत परिचारक यांनी स्पष्टीकरण देताना आपली 1 चाचणी पॉझिटिव्ह आली असली तरी नंतरच्या 3 चाचण्या निगेटिव्ह आल्या आहेत असा खुलासा केला आहे.
याबाबत अधिक माहिती देताना आ. परिचारक म्हणाले, अर्थसंकल्पीय अधिवेशनाच्या पूर्वी मी पंढरपूर ग्रामीण रुग्णालयात २६ फेब्रुवारीला स्वँब तपासणीसाठी दिला होता. याचा अहवाल २८ रोजी पॉझिटिव्ह आल्याने मी स्वतः विलगीकरणात गेलो. यांनतर माझा मुलगा, जो एमडी (डॉक्टर)आहे, त्याने rapid टेस्ट करण्याचा सल्ला दिला. त्यानुसार दोन वेळा चाचणी केली ती निगेटिव्ह आली, या काळात आपण कारखान्यावर विलगीकरणात राहिलो. यानंतर पुन्हा आर.टी.पी.सी.आर. चाचणी पुण्यात केली. तिही निगेटिव्ह आली.
या दरम्यान डॉ. दाते यांना सर्व बाबी सांगितल्या, जिल्हा शल्य चिकित्सक यांच्याशी बोललो. त्यांच्या म्हणण्यानुसार ५% चाचण्यांचे निकाल चुकू शकतात. तीन वेळा चाचण्या करून अधिवेशनाला आलो, याबाबत सभापतींना माहिती दिली. आज ज्या आमदार शशिकांत शिंदे यांनी हा प्रश्न उपस्थित केला, त्यांना ही माझ्या या चाचण्यांबाबत बोललो होतो. काल पुन्हा मी चाचणी केली आहे, ती पण निगेटिव्ह आहे.
वास्तविक, पाहता मीच शासकीय यंत्रणेबाबत या चाचण्यांचा प्रश्न सभागृहात उपस्थित करायला हवा होता. मात्र त्यात त्यांची काय चूक ? काहीवेळा फाँल्स पाँझिटिव्ह…फाँल्स निगेटिव्ह होवू शकते याची कल्पना आहे. मी काहीही लपविलेले नाही, मी माझे चाचणी अहवाल पटलावर ठेवायला तयार आहे. यामुळे कोणाचाही गैरसमज नसावा असेही आवाहन आ.परिचारक यांनी केले आहे.
