असा असेल खा. पवारांचा पंढरपूर दौरा

सुधाकरपंत परिचारक, राजूबापू पाटील, हभप रामदास महाराज जाधव यांच्या कुटुंबियांचे सांत्वन

पंढरपूर : ईगल आय मीडिया

राष्ट्रवादी काँग्रेसचे अध्यक्ष खा शरद पवार हे मंगळवारी पंढरपूर तालुका दौऱ्यावर येत आहेत. जेष्ठ नेते सुधाकरपंत परिचारक, राष्ट्रवादी चे प्रांतिक सदस्य राजूबापू पाटील आणि हभप रामदास महाराज जाधव यांच्या निधनानंतर त्यांच्या कुटुंबियांचे सांत्वन करण्यासाठी खा.पवार येत आहेत.

खा. शरद पवार हे मंगळवारी सकाळी पुण्यातून निघणार आहेत. टेम्भुर्णी मार्गे त्यांचे भोसे येथे दुपारी 12 च्या सुमारास आगमन होणार असून राजूबापू पाटील यांच्या घरी जाऊन कुटुंबियांची भेट घेतील. त्यानंतर दुपारी 1 वाजता ते पंढरपूर येथे माजी आ. सुधाकरपंत परिचारक यांच्या निवासस्थानी भेट देऊन परिचारक कुटुंबियांचे सांत्वन करतील. दुपारी दीड वाजण्याच्या दरम्यान संत कैकाडी बाबांचे पुतणे हभप रामदास महाराज जाधव यांच्या निवासस्थानी जाऊन त्यांच्या कुटुंबियांचे सांत्वन करणार आहेत.

दुपारी 2 वाजल्यापासून आ. भारत भालके यांच्या सांगोला रोडवरील निवासस्थानी खा. शरद पवार यांचा राखीव वेळ असून त्यावेळी ते कार्यकर्त्यांशी संवाद साधतील आणि परत बारामतीकडे मार्गस्थ होतील.

गेल्या वर्षी ऑक्टोबरमध्ये विधानसभा निवडणुकीत खा. पवार हे प्रचार सभेत आले होते. त्यांनतर पवारांचा पहिलाच पंढरपूर दौरा आहे. राजकीय,सहकार, अध्यात्मिक क्षेत्रातील तीन उत्तुंग व्यक्तिमत्त्व कोरोनाची शिकार ठरले आहेत. या दुःखद घटनांच्या पार्श्वभूमीवर पवार आपल्या सहकाऱ्यांच्या कुटुंबियांचे सांत्वन करण्यासाठी येत आहेत त्यामुळेच त्यांच्या दौऱ्याकडे जिल्ह्याचे लक्ष लागले आहे.