मध्यप्रदेशात सतना जिल्ह्यातील विचित्र घटना
टीम : ईगल आय मीडिया
मध्य प्रदेशमधील सतना जिल्ह्यामधील एका आगळ्यावेगळ्या कार्यक्रमाची सध्या जोरदार चर्चा सुरू आहे. येथील एका पाळीव कुत्रीने पाच पिल्लांना जन्म दिला म्हणून कुत्रीच्या मालकाने चक्क १२ गावच्या लोकांसाठी जंगी समारंभ आयोजित केला होता.
जुली नावाच्या पाळीव कुत्रीने पाच पिल्लांना जन्म दिल्यानंतर मालकाला आनंद गगनात मावेनासा झाला. आपल्या कुत्रीने पाच पिल्लांना जन्म दिल्याच्या आनंदात या मालकाने आजूबाजूच्या गावातील लोकांसाठी जेवणायाचे आयोजन करण्याची इच्छा व्यक्त केली. गावकरी आणि कुटुंबियांनी या व्यक्तीच्या इच्छेचा मान राखत महाभोजनाच्या कार्यक्रमाची तयारी सुरु केली.
गाणी, डान्ससारख्या गोष्टींच्या माध्यमातून नुकत्याच जन्मलेल्या कुत्र्यांना आशिर्वाद देण्यासाठी पाहुण्यांची गर्दी झाल्याचं पहायला मिळालं. ही घटना सतना जिल्ह्यातील खोही गावात खरोखर घडलीय. या समारंभामध्ये १२ गावच्या लोकांना आमंत्रण देण्यात आलं होतं. समारंभात कुत्रीचं कौतुक करण्याबरोबरच महाभोजनाच्या कार्यक्रमाचंही आयोजन करण्यात आलं होतं.
१२ गावांमधील जवळजवळ दोन हजार जणांना या महाभोजनाच्या कार्यक्रमाचं आमंत्रण देण्यात आलं होतं. लोकांनाही या कार्यक्रमामध्ये येऊन भोजनाचा आनंद घेतला आणि कुत्रीला तसेच तिच्या पिल्लांना भरभरुन आशिर्वाद दिले.
या कार्यक्रमानिमित्त जुलीला खास कपडे शिवण्यात आलेले. या कार्यक्रमामध्ये ढोल वाजवण्यात आले, घोडे नाचवण्यात आले आणि आलेल्यांना नाचता यावं म्हणून ऑर्केस्ट्राचेही आयोजन करण्यात आलं होतं.लोकांनी या कार्यक्रमातील सर्वच गोष्टींचा आनंद घेतल्याचे न्यूज १८ ने दिलेल्या वृत्तात म्हटलं आहे.
