अदानी पवारांच्या घरी येऊन गेले आणि राज्य सरकारने वीज बिल माफीविषयी घुमजाव केले.
टीम : ईगल आय मीडिया
सरकार वीज कंपन्यांना पाठिशी घालत आहे, असा निशाणा साधत राज ठाकरे यांनी थेट शरद पवार यांच्यावर गंभीर आरोप केला आहे. सुरुवातीला ऊर्जामंत्र्यांनी वीज दरात कपात करण्यात येईल असे सांगितले होते. त्यानंतर मात्र त्यांनी घुमजाव केले. राज्य सरकारने लॉकडाऊन काळातील वीजबिलांबाबत दिलेल्या आश्वासनावर घुमजाव केल्याने वादळ उठले असतानाच मनसे अध्यक्ष राज ठाकरे यांनी या मुद्द्यावरून आज थेट राष्ट्रवादी काँग्रेसचे अध्यक्ष शरद पवार यांच्यावर निशाणा साधला आहे.
या प्रश्नावर मी राज्यपालांची भेट घेतली तेव्हा त्यांनी मला शरद पवार यांच्याशी बोलून घ्यायला सांगितले. त्यानुसार मी शरद पवार यांच्याशी बोललो. तेव्हा पवार यांनी मला वीज कंपन्यांना पत्र लिहून त्याची प्रत पाठवण्याचा सल्ला दिला. त्यानुसार पवार संबंधित कंपन्यांच्या प्रमुखांशी बोलणार होते, पण पाच-सहा दिवसांत माझ्या कानावर बातमी आली की, अदानी शरद पवार यांच्या घरी येऊन गेले. त्यांच्यात काय बोलणं झालं हे कळलं नसलं तरी सरकारने त्यानंतर कोणतंही वीजबिल माफ केलं जाणार नाही, अशी भूमिका घेतली. त्यामुळे सरकारने घुमजाव का केले?, असा प्रश्न मुख्यमंत्री आणि संबंधित मंत्र्यांना पत्रकारांनी विचारायला हवा, अशी अपेक्षा राज यांनी व्यक्त केली.
वीज कंपन्यांना नफा झाला नाही म्हणून सरकार नागरिकांची पिळवणूक करणार असेल तर ती बाब गंभीर आहे?, असे नमूद करताना यात लेनदेन झाल्याची शक्यताही राज यांनी व्यक्त केली. वीजबिल माफ होण्यासाठी सरकारने वीज कंपन्यांशी चर्चा करणे आवश्यक आहे. पण अशी चर्चा होताना दिसत नाही. ही चर्चा का थांबली, हा महत्त्वाचा प्रश्न आहे. काहीतरी लेनदेन झाल्याशिवाय अशी चर्चा थांबत नाही, अशी तोफच राज यांनी डागली.
लॉकडाऊन काळात वीज ग्राहकांना भरमसाठ वीजबिले आली होती. ही बिले अनेक ग्राहकांनी भरलेली नाहीत. ही भरमसाठ बिले माफ केली जातील, अशी आशा ग्राहकांना होती. तसे संकेतही सरकारकडून मिळाले होते. मात्र, गेल्या काही दिवसांपासून वीज कंपन्यांकडून थकबाकी वसुलीसाठी ग्राहकांना नोटिसा बजावण्यात येत आहेत. १५ दिवसांत थकबाकी न भरल्यास वीज कनेक्शन कापण्याचा इशाराही देण्यात येत आहे.
